РОССИЯ ФЕДЕРАЦИЯСИ ГЕНЕТИКА ВА СЕЛЕКЦИЯ МАРКАЗИ ЭКСПЕРТЛАРИ ЎЗБЕКИСТОНДА

Ветеринария ва чорвачиликни ривожлантириш Давлат қўмитасида Россия Федерацияси генетика ва селекция маркази экспертлари иштирокида давра сухбати ташкил этилди. Тадбирда қўмита масъул ходимлари, Ўзбекистон наслли қуён етиштирувчилар ассоциацияси, “Микрокредитбанк” акциядорлик тижорат банки, Инновацион ривожланиш вазирлиги, “Ўзчармсаноат” уюшмаси вакиллари ҳамда қуёнчилик фермер хўжаликлари рахбарлари иштирок этишди. Йиғилишда қуёнчиликни ривожлантиришда замонавий ва инновацион услубларни жорий этиш, қуёнчилик маҳсулотлари ишлаб чиқариш ҳажмини ошириш, қуёнлар сонини кўпайтириш, шунингдек маҳаллий шароитда қуёнчилик фермер хўжаликлари фаолиятини кенгайтириш масалалари муҳокама қилинди.

Франциянинг “Hycole” зотли қуёнларини етказиб берувчи Россия қуёнчилик генетикаси ва селекцияси маркази экспертларига кўра, келгусида сохада йирик лойихаларни амалга ошириш, қуёнчилик комплексларини ташкил этиш, қуён гўшти етиштириш ва тери хом ашёларини чуқур қайта ишлаш тармоқни янада кенг ривожланишига хизмат қилади. Бунинг учун эса мутахассислар қуёнчиликни ривожлантириш ва қуёнчилик маҳсулотларини ишлаб чиқаришда хорижий илғор тажрибаларни тўлиқ ўзлаштириши керак бўлади. Натижада экспортбоп сифатли маҳсулотларни қайта ишлаш имконияти юзага келади.
Давра сухбати давомида хорижий экспертлар айнан шу масалаларга ҳам тўхталиб ўтишди. Тадбир сўнггида Ўзбекистон наслли қуён етиштирувчилар ассоциацияси ҳамда Россиядаги ваколатли генетик ва селекция маркази ўртасида ўзаро ҳамкорлик шартномалари имзоланди.